Алматының бас санитарлық дәрігері Жандарбек Бекшин оқушыларға офлайн режимде оқу мүмкіндігін қамтамасыз ету үшін қабылданып жатқан шаралар туралы айтты.
Біз Мемлекет басшысының оқушылар офлайн жағдайда оқуы тиіс деген тапсырмасын орындауды көздеп отырмыз. Бұл үшін оқушыларға қауіпсіз жағдай жасауымыз керек. Біз осы бағытта жұмыс істеп жатырмыз», – деп атап өтті Ж. Бекшин онлайн брифингте.
Ж.Бекшин ең алдымен, мегаполистің барлық мектептеріне «Ashyq» жобасы енгізіліп жатқанын айтты. Бұл КВИ жұқтырған немесе онымен байланыста болған адамдарды оқу орындарына жібермеу үшін жасалады. Қазіргі уақытта «Атамекен» аумақтық палатасының хабарлауынша, мектептер мен мектепке дейінгі мекемелердің 100% QR-код алды және 1 қыркүйектен бастап «Ashyq» бойынша жұмыс істеуге дайын.
«Екінші қорғану желісі – оқушылар көп жиналатын орындарда, асханаларда, санитарлық тораптарда – рециркуляторлар енгізу. Біз бұл мәселені мектеп әкімшілігімен қарастырып, ата-аналар комитеттерімен талқылаймыз. Үшінші жолы – сыныптарда ауаны зарарсыздандыратын дезораторлар орнатуға болады. Бұл – жапондық инновациялық әзірлеме. Аппараттар Қазақстанға жеткізілді. Дезинфекциялаушы құрал сертификатталған, тексеруден өткен және Денсаулық сақтау министрлігінің санэпидбақылау комитетінде тіркелген. Егер бұл бағдарлама мақұлданса, оны да енгіземіз», – деді Алматының бас санитарлық дәрігері.
Ол қала оқушыларын қауіпсіз оқытуды қамтамасыз ету – ведомство жұмысының басты бағыты екенін ерекше атап өтті.
«Біз балаларды қауіпсіз жағдайда оқыту үшін мұқият дайындалып жатырмыз. Жаңа оқу жылында оларды офлайн оқытуды қамтамасыз етуіміз керек. Бір жылдан бері балалар қашықтан оқып келеді және бұл, әрине білім сапасына әсер етеді», – деді Ж.Бекшин.
Студенттер бойынша Ж. Бекшин ЖОО мен колледждерде оқытушыларға вакциналау жоғары деңгейде жүргізілетінін айтты. Сондай-ақ, жоғары және орта арнаулы оқу орындарына «Ashyq» жүйесін енгізу мәселесі қойылып отыр.
Ж.Бекшин студенттер арасында вакциналау бойынша түсіндіру жұмыстары жүргізіліп жатқанын жеткізді.
«Студенттер де онлайн оқудан шаршады. Бірақ оларды толығымен қорғау үшін барлық талаптарды орындап, мектептерде ғана емес, қаланың колледждері мен ЖОО-да қауіпсіз білім алуы үшін жағдай жасау қажет», – деді Алматының бас санитарлық дәрігері.
