Премьер-министр Әлихан Смайылов Білім министрлігіне үйде тәртіп ережелерін енгізу үшін мектептерде сабақ енгізуді тапсырды.
18 қазандағы үкімет отырысында тұрмыстық зорлық-зомбылық мәселелері қаралды. Ішкі істер министрі Марат Ахметжанов жыл басынан бері Қазақстанда тұрмыстық зорлық-зомбылық туралы 100 мың хабарлама түскенін айтқан болатын.
Үкімет басшысы бұл мәселені бала тәрбиесінен бастап, кешенді түрде шешуді тапсырды.
«Білім министрлігі балаларға отбасын құрметтеу нормаларын және үйде өзін-өзі ұстау ережелерін бойларына сіңіру үшін қосымша сабақ уақытымен қамтамасыз етуі керек», – деді премьер-министр.
Смайылов облыс әкімдіктеріне тұрмыстық зорлық-зомбылық құрбандарына арналған дағдарыс орталықтарының, уақытша бейімдеу орталықтарының, сондай-ақ мәжбүрлеп емдеуге арналған наркологиялық орталықтардың санын көбейтуді тапсырды.
Еңбек және халықты әлеуметтік қорғау министрлігіне өз кезегінде қауіп-қатер тобындағы отбасыларды анықтап, мақсатты профилактикалық жұмыстарды жүргізу міндеттелді.
Премьер-министр Денсаулық сақтау министрлігіне мәжбүрлеп емдеуге жіберу рәсімдерін жеңілдетуді тапсырды.
«Халықаралық тәжірибені ескере отырып, құқық бұзушыларға психологиялық терапия шараларын қолдану бойынша ұсыныстар әзірлеңіз», – деді Смайылов.
Жыл басынан бері қол көтергендерге қатысты 35 мың әкімшілік хаттама толтырылған.
