Қарағанды облысының Ұлытау ауданында оқушылар ат жарысында үздіктерді анықтады.
Тай жарыста 15 шабандоз бақ сынады.
«Ұлттық спорт түрлерін, соның ішінде ат спортын дамыту – Ұлытау ауданы үшін маңызды міндет. Балаларға кішкентай кезінен бастап атқа, ат жарысына деген сүйіспеншілікті сіңіруге тырысамыз, сол арқылы оларда спорттық рух пен көшбасшылық қасиеттерді тәрбиелейміз. Тай жарыс жергілікті әкімдік пен тұрғындардың қолдауымен ұйымдастырылды», – деп атап өтті шараны ұйымдастырушылар.
Жарысқа қатысушылар белгіленген шеңберді төрт рет айналып өтуі керек болды. Нәтижесінде 15 жастағы Қыран Серік жеңіске жетті.
«Қыран бала кезінен жылқы малын жақсы көреді. Бұл менің әкемнің балама сіңірген ерекше махаббаты. Әкем оны атқа отыруды ғана емес, сонымен бірге жылқыны жаратуды, баптауды да үйретті. Ауылда менің ұлымды және оның асау аттарды үйрететінін бәрі біледі. Ауданымызда ұлттық спорт түрлері дамып келе жатқанына қуаныштымын. Бұл балаларды тәрбиелеуге көмектеседі», – деді оқушының анасы Гүлсұлу Балдуова.
Бірінші орын үшін Қыранға теледидар сыйға тартылды. Сондай-ақ, «Сарын Сай» шаруа қожалығының басшысы Асқар Бектемісов жас шабандозға 100 мың теңге көлемінде ақшалай сыйлық табыс етті.
Екінші және үшінші орындарды ағайынды шабандоздар Әсет пен Серікболсын Сайлау алды. Жеңімпаздар мен қатысушылар бағалы сыйлықтармен марапатталды.
Агата Мухамеджанова
