Алматы қалалық мәслихаттың депутаты, белгілі журналист, «Алматы ақшамы» басылымының бас редакторы Қали Сәрсенбай «Nur Otan» партиясының Алматы бөлімшесінде жастармен кездесті.
Биыл жастар жылы деп жарияланғаны тегін емес. Ел болашағы – жастар. Елбасымыз Нұрсұлтан Әбішұлы Назарбаев үнемі жастарға қолдау көрсетіп келеді.. Сондай-ақ жауапкершілікті жаңа буынға сеніп тапсыруы үлкен істің, өнегенің басы болғаны да рас. Бұл жастарға үлкен сенім арту,- деп бастады жүздесуді Қали Сәрсенбай.
«Алаш ардақтылары – Жүсіпбек Аймауытов, Мағжан Жұмабаев, Әлихан Бөкейхановтар кезінде бір-біріне қамқор болған. Әлихандар 30-ға жетпей, Тұрар Рысқұловтар 19 жасында «атқа міне» бастаған», – деді Қали Сәрсенбай.
Оның айтуынша, жастар ұлт болашағына қызмет етуге мүмкіндік беретін білім алуы керек. Ол үшін мемлекет тарапынан барлық жағдай жасалып жатыр.
«Елбасы өзінің «Рухани жаңғыру» бағдарламасында да бұған кеңінен тоқталып өткен. Барлығы өз негізін кешегі ұлыларымыз айтқан тамырдан алады. Қазіргі бағдарламамыз, бағытымыз осы. «Болашақ» бағдарламасымен шет елдерде қаншама кадрлар дайындалды. Қазір сол оқып келген студенттер сан салада жұмысқа кіріп жатыр. Ертеректе Нұрсұлтан Назарбаев «Болашақ» бағдарламасымен оқып жатқан жастарға арнап хат жазған да болатын. Онда жастардың міндеті – жоғары білім алып, ал алған білімін елді дамытуға, Қазақстанды әлемге танытуға жаратуы тиіс екендігін атап өткен еді. Сондай-ақ «Nur Otan» партиясының бір қанаты – Жас Отан. Ол мына отырған сіздер. Ендеше алған тәрбие, білім, ертең өз ұлтыңа мәңгілік қызмет етуі тиіс. Осы бағытта жұмыс істеу керек», – деді Қ.Сәрсенбай.
Жиынға келген жастар қоғам қайраткеріне ғылым мен білім, журналистика, қоғам саласында алаңдатып жүрген сұрақтарын қойды.
