Ақмола облысының шалғай ауылдарындағы 18 мың оқушысы бар 311 мектеп оқу жылын санитарлық талаптарды сақтай отырып штаттық режимде бастайды. Бұл туралы әкімдік отырысында облыстық білім беру басқармасының басшысы Бейбіт Жүсіпов айтты.
“Облыстағы шалғай ауылдарындағы барлығы 18 мың оқушысы бар 311 мектеп оқу жылын санитарлық талаптарды сақтай отырып штаттық режимде бастайды. Ал 243 мектептегі 115 мыңға жуық оқушы қашықтан оқытылады. Сонымен бірге, 3 мыңнан астам бастауыш сыныптарда ата-аналардың өтініші бойынша 15 оқушыдан аспайтын кезекші сыныптар жұмыс істейтін болады”, – дейді облыстық білім беру басқармасының басшысы Бейбіт Жүсіпов.
Басқарма басшысы атап өткендей, облыстың барлық жалпы білім беретін мектептері жоғары жылдамдықты интернетке қосылған. Облыс мектептерінде барлығы 16 мыңнан астам компьютер бар болса, бүгінгі күні оның саны 1,6 мың компьютермен толығып отыр. 1 қыркүйекке дейін жергілікті бюджет есебінен тағы 235 компьютер сатып алу жоспарланған. Сондай-ақ, Үкімет резервінің қаражаты есебінен 23 мыңнан астам компьютер сатып алынатын болады. Бірінші кезекте осал санаттағы балаларды компьютермен қамтамасыз етіледі.
Сонымен қатар, өңірде балабақшалардың жұмысы да кезең-кезеңмен қайта жанданып келеді. 159 мектепке дейінгі ұйымда 411 кезекші топ ашылған.
